Turkiston sanʼat saroyida Milliy gvardiya Harbiy musiqa akademik litseyining 80 yilligi munosabati bilan konsert dasturi boʻlib oʻtdi
1944-yili may oyida Toshkent harbiy musiqachilar maktabi sifatida oʻz taʼlim faoliyatini boshlagan bugungi Milliy gvardiya harbiy musiqa akademik litseyi Qurolli Kuchlar tarkibidagi harbiy orkestr jamoalariga sifatli kadrlarni tayyorlab berish maqsadida 2022-yilda Prezidentimizning qaroriga muvofiq “Oʻzbekiston Respublikasi Milliy gvardiyasi Harbiy musiqa akademik litseyi” etib qayta tashkil etildi. Litseyning 80 yilligi munosabati bilan poytaxtimizdagi Turkiston saroyida hisobot konserti oʻtkazildi.
Hozirda ushbu taʼlim muassasasi Milliy gvardiya tasarrufiga oʻtkazilib, Oʻzbekiston Respublikasi Qurolli Kuchlari tarkibidagi harbiy orkestr jamoalari, shuningdek, boshqa orkestr va badiiy jamoalar uchun damli va zarbli cholgʻular ijrochiligi yoʻnalishida kadrlarni maqsadli tayyorlash tizimini samarali tashkil etish maqsadida tashkil etilgan “Oʻzbekiston Respublikasi Milliy gvardiyasi Harbiy musiqa akademik litseyi” bugunga qadar koʻplab iqtidorli yigit-qizlarni kashf etgan oʻziga xos taʼlim massasidir. Kuni kecha poytaxtimizdagi Turkiston saroyida oʻtkazilgan litsey jamoasining hisobot konsertida ham musiqa ixlosmandlari bunga oʻzlari guvoh boʻlishdi. 20 dan ortiq jahonning mashhur kompozitorlari ijodiga mansub asarlar yosh iqtidor egalari tomonidan mahorat bilan ijro etildi.
Konsert davomida oʻquvchilarga litseyning ilmiy darajali professor-oʻqituvchilari, sanʼat arboblari va xizmat koʻrsatgan artistlar hamda soha mutaxassislari musiqiy asarlarni mohirona ijro etishida oʻz koʻmaklarini berib turishdi.
Konsertga tashrif buyurgan mehmonlar ham yosh musiqachilarni olqishlab turishib, ularga ilhom bagʻishladi. Ishonamizki, ushbu oʻquvchilar ichidan kelgusida yetuk musiqachilar va bastakor hamda kompozitorlar yetishib chiqishadi.
